An 1956 Ptr, selon biografi SVR par Reddi ek Experiments in Democracy par Dukhira, ti pe lager kont propozision PR ki guvernman kolonial ti met de lavan kom system elektoral. Mem lepok Mauritius Times lans so gran kanpayn Down With PR. Malerezman le 22 Mars, Guy Rozemont, lider Ptr, desede a laz 40 an. Lerla eleksion parsiel dan Por-Lwi pu ranplas li vin en referandum lor PR. Me leta-mazor Ptr ti telman for sa lepok la ki zot fini par gayn parsiel la an Me kan zot kandida Willy Dupré bat Alex Bhujhoharry, kandida Parti Morisyin. Sa anter PR pu de bon.
Inpe letan avan li mor, Guy ti prezid en komite egzekitif ki ti expilse so frer Philippe depi dan Ptr akoz li ti vot ansam ek ban konservater dan Konsey Lezislatif an faver PR. Navin Ramgoolam abitie rakont en zistwar ki ti derule kot SSR lari Deforz kot sipozeman Guy ti tret Philippe de tret e ti bez li en kudpwin. Par kont zame Navin rakont expilsion Philippe depi Ptr.
Reform elektoral se en zafer mari konplike e tu sanzman a nu exselan system elektoral bizin pas par omwin de referandum. Promie referandum la pu san-angazman (non-binding) e deziem la avek-angazman. Me avan sa bizin ena ban bon kanpayn edikasion lepep ek ban diskision aproprie. Mon pibliye en ameliorasion elegan nu exselan system elektoral an Desam 2025 e an Oktob 2024 mo ti pibliye en gid ki parmi enta zafer explike kuma system elektoral rant dan striktir guvernans en pei.
No comments:
Post a Comment