Depi ki Ramgoolam in anonse dan so bidze ki pe repus laz elizibilite pansion vieyes (BRP) par 5 an a 65 an lepep Moris lor santie de ger. E avek rezon. Pe dir nu ki li insutenab parski li reprezant 7.8% GDP e sa sif la pu kontinie ogmante. Seki insutenab se flat tax 15% ki Sithanen ti servi pu frir nu lekonomi apartir 2006 ek benediksion Ramgoolam e ki tu guvernman kin vini apre in garde pli u mwin.
Get sa, Sithanen ti dir nu ki ti pu gayn 8% krwasans an mwayen ek so pwazon me anfet nu pan gayn mem lamwatie sa to la lor dernie 19 an – nun gayn zis 3.4% e sa fin koz en mank a gayne de Rs1,200 milyar rupi dan lakes guvernman a lafin 2024. Si nu ti gayn 8% BRP an 2024 ti pu vo zis 3.4% GDP. 5.7% si nu ti gayn krwasans mwayen ki nun gayne depi lindepandans ziska 2005. Dan tiart lao nu montre usi so pwa pu de lot to krwasans.
Seki pli komik ladan se telman flat tax 15% Sithanen fin andomaz nu lekonomi ek nu pei ki Ramgoolam in ogmant to ki ban gro saler peye selman pu trwa an. Apre trwa an ki arive, nu rekumans frir lekonomi e nu re koste ek stati diunk de Moody's?
Solision la li sinp, li gard "fair-share contribution" pu tultan, li elimin ban depans siperfli kuma ranz ankor sime (fin ranz 1,035km sime ant 2006 ek 2022 donk bizin met en poze ar sa) e li inplemant ban bon politik. De tut le fason pena sa ni dan manifest elektoral ni dan program guvernmantal e si li anvi fer sa li bizin swa organiz en referandum u disut parlman pu diman elekter permision.
