Li sinp. Ler ti met flat tax 15% Sithanen an 2006 ti sipoze gayn krwasans 8% ar sa (ti gayn krwasans mwayin de 5.1% ant 1968 ek 2005) be kuma tiart la montre nu dernie 4 guvernman zame in resi ariv pre ek sa target la. Nun pas apepre de 5% pu promie guvernman, a 3.8% pu deziem, 3.6% pu trwaziem e 1.7% pu katriem. Sel lane nu fin gayn en krwasans 8% u plis se an 2022 lawsi se akoz lekonomi ti kontrakte par preske 15% an 2020 ek Kovid. Padayachy pran trwa dernie lane so manda e dir nu lekonomi ti an bum, ki en fason rigolo interpret ban sif. StatMu pe prevwar en krwasans 3.1% pu 2025 e sa pa ti pu diferan mem si pa tiena sanzman rezim.
Sa tiart la montre osi ki krwasans pandan 2em e 3em guvernman ti mwins ki lamwatie target donk pa kav blam Kovid pu sa. Overol ant 2006 ek 2024 krwasans mwayin fin selman 3.3% e sa explike kifer nu sosiete pe kontinie dezintegre a vites gran V. Byinsir ban nanti fin byin profite e la pe rod fer grand mazorite Morisyin pey pu sa katastrof la e zot pe fer sa par atak nu leta providans. Ban latak la pu kontinie e vin pli frekan parski en striktir taksasion tro ba e insutenab se en pwazon.
No comments:
Post a Comment