Friday, September 13, 2013

Inpe Zafer Ki Totalman Inprevizib

  1. Guvernman pu fer 7,500 a 9,000 zelev fel zot legzame CPE ankor enn fwa biento. Eh wi, sa li pu enn mari sirpriz sa. Nu pu totalman etone. Anfin, ziska mem kantite zelev fel lane prosen.
  2. 11 dimunn mor dan inondasyon le 30 mars. Non, u pe fer erer: zame u ti truv enn PPS bloke dan so loto divan la rad le 13 fevrier. Aret reve kamarad!
  3. 11 dimunn mor dan enn bis CNT. Enn kut fluk sa papao. Aksidan Montebello 2009? Enn deziem kut fluk sa do matlo.
  4. Kupir dilo rekumanse ankor. Pa fot guvernman sa. Se u fot. U pa pe priye bondie ase pu fer lapli tombe. Se usi inpe so fot: li pa konn viz kuma dimunn. Nu dan guvernman nu pu kontinye ogmant pri dilo ziska u aret servi dilo uswa ziska u la priyer marse.
  5. Lekonomi pann rebondi kan lekonomi mondyal finn sort dan resesyon en 2009. Kifer u prese kumsa, ein? Finn gayn zis katran depi resesyon mondyal finn fini. Li pu bizin rebondi dan prosen sinkant banane. E pa bliye ki se akoz bann kondisyon extern ki nu dan fatak. Apre aret pleyne. Nu dan byen isi gras a reform. Pena bomb be tom lor u latet ek anplis nu pe travay dir pu polisyon vinn kuma dan lasinn. 
  6. Flat tax finn zet 22,000 dimunn dan lamizer. Pfew, enn kwinsidans sa mo burzwa. Sat mao pu maye lera vit vit la. Pa trakase.
  7. Buku milyar FDI pa finn redwir somaz mem. Get sa, pa akoz u ena enn degre liniversite ki u pa pu kapav vinn enn bon zardinye dan enn proze IRS. Wena bel swa: u kav netway pisin usi. Apre ler u rant lakaz pa bliye ekut nuvel pu apran listwar u pei kuma bizin.

1 comment:

Sanjay Jagatsingh said...

Mwespere pa pu bizin azut enn lalign pu Porlwi by light.