Se repons kin gayne en pake fwa ler ti pe deman ban pros kot kav gayn ban zafer ki pa ti pe gayne fasilman. E preske tuletan ler ti pe al laba ti pe gayn zot. Pan tarde ditu pu kontan al dan sa magazin Vakwa la. Sifizaman kontan ki inpe zafer ki kav gayne laba ti pe fer en manier aste zot laba mem. In fer sa sistematikman. Esansielman parski leksperians la ti top. Sak fwa. Rezon prinsipal kifer li fin kumsa se interaksion ek France, so proprieter ki fek desede. Kel boner ki sa fin dire pandan tu sa deseni la.
Mo fin trist ler mon apran so depar. Lerla mon reflesi kifer mo ti pe kontan al laba. Apar le fe ki France ti ekstreman sinpatik, Mexico ena en reynj prodwi ase larz. Lot zafer se ki France ti en bon vander. Li ti kon ekute byin. Par egzanp ler rant dan so magazin – kurb latet en tigit ek fer en ti slalom pu evit ban lartik ki apandan – nu ariv kot so kontwar/vitrin. De fwa li pu pe servi en klian donk nu atan en tigit e nu get li debruye. Nivo servis la elve parey. Ler ariv mo tur, li salie mwa "Alor meusieuh, ki manier?", mo repon li "Korek France, u ki manyer?". Si pe rod pil 3A li demande sipa pu kamera sa uswa pu en lot gadiet elektronik. Li bizin linformasion la pu kone si pa li tir ban version hevi-diuti. De fwa li poz en kestion ki mo pa tro konpran. Ler repons pa paret pu vin a tan, li poz en deziem pu sa kav oriant li vit ver en prodwi pli aproprie. Tusala suvan ek en ti rie omilie. Li ti fer sa pe inport ki pe rode. Genius Bar an plas. Plis en ti diskawnt.
Ti kav fer en zoli lartik pu en revi kuma Harvard Business Review lor fason ki France ti pe opere. En ti klip kuma telma dimun fin fer lor Omelette Man dan Jodhpur, Rajasthan ek lor ban lezot ki fin metriz zot lar/operasion ti pu en lot posibilite. Se posib ki kiken fin fer li. Tiabon. Sinpati a fami de France e 105,000 abitan de Vakwa/Fenix ki an dey. Byin ki lin ale, en dimun pa vreman mor tan ki kontinie koz so koze. Dan ka France nu bon suvenir de li pu res ar nu pandan lontan.
No comments:
Post a Comment