Inpe Zafer Ki Totalman Inprevizib

1. Guvernman pu fer 7,500 a 9,000 zelev fel zot legzame CPE ankor en fwa byinto. Eh wi, sa li pu en mari sirpriz sa. Nu pu totalman etone. Anfin, ziska mem kantite zelev fel lane prosen.
2. 11 dimun mor dan inondasion le 30 mars. Non, u pe fer erer: zame u ti truv en PPS bloke dan so loto divan la rad le 13 fevrier. Aret reve kamarad!
3. 11 dimun mor dan en bis CNT. En kut fluk sa papao. Aksidan Montebello 2009? En deziem kut fluk sa do matlo.
4. Kupir dilo rekumanse ankor. Pa fot guvernman sa. Se u fot. U pa pe priye bondie ase pu fer lapli tonbe. Se usi inpe so fot: li pa kon viz kuma dimun. Nu dan guvernman nu pu kontinie ogmant pri dilo ziska u aret servi dilo uswa ziska u la priyer marse.
5. Lekonomi pan rebondi kan lekonomi mondial fin sort dan resesion an 2009. Kifer u prese kumsa, ein? Fin gayn zis kat an depi resesion mondial fin fini. Li pu bizin rebondi dan prosen sinkant banane. E pa bliye ki se akoz ban kondision extern ki nu dan fatak. Apre aret plinye. Nu dan byin isi gras a reform. Pena bomb be tom lor u latet ek anplis nu pe travay dir pu polision vin kuma dan lasin. 
6. Flat tax fin zet 22,000 dimun dan lamizer. Phiu, en kwinsidans sa mo burzwa. Sat mao pu may lera vit vit la. Pa trakase.
7. Buku milyar FDI pa fin redwir somaz mem. Get sa, pa akoz u ena en degre liniversite ki u pa pu kapav vin enn bon zardinie dan en proze IRS. Wena bel swa: u kav netway pisin usi. Apre ler u rant lakaz pa bliye ekut nuvel pu apran listwar u pei kuma bizin.