Lefe Savat Leponz Ek Gato Pima Lor Inegalite

Minis finans abitie dir ki li konpran kiete lamizer parski li ti mizer limem ek ki li ti van gato pima dan bazar rozil. Resaman lor radio li fin azute ki li ti osi met savat leponz ziska laz sez an e ki donk ban pov kav kont lor li pu zot refer.

Abe ler nu get distribision reveni nasional apre so premier pasaz kom minis finans de septam 1991 a desam 1995 nu oblize met so parol an dut pu trwa rezon prinsipal kuma sa tablo lao p indike:

1. 10% ban menaz pli mizer (mo sipoze dan sa group lamem truv ban dimun ki met savat leponz e van gato delwil) fin truv zot par reveni nasional degringole par 13%. Apel sa laflam.

2. Tu le 10 grup menaz, sof en, fin truv zot par diminie. An efe, zis 10% menaz pli ris fin truv zot part gato nasional ogmante par 10.8%. Apel sa dimiel.

3. Par 10% menaz pli ris fin pas de 12.1 fwa par 10% menaz pli pov a 15.4 apre premier pasaz Sithanen kom minis finans.

Donk nu konklir ki probableman akoz minis finans, buku dimun fin bizin met savat leponz ziska o mwin laz sez an e ki zot fin oblize van gato pima dan bazar.

Byin sir sa pa v dir ki si u fin met tanga ziska laz diset an trwa kar e ki un van badia, gato lisu ek pima frir dan bazar porlwi u pa pu rapel u la mizer si u vin minis finans.